Sumarblóm blómstra flest meira ef þau eru á sólríkum stað. Hádegisblóm loka t.d. blómunum þegar ekki er sól. Fallegt er að planta sumarblómum í beð með fjölærum plöntum og runnum, einnig í steinhæðir til að fá liti. Algengasta millibil milli sumarblóma er 15-20sm. Setjið ekki mikinn áburð í sumarblómabeð, en þó smávegis. Gætið þess að plönturnar séu vel rakar (rótarhnausinn gegnblautur) áður en þið plantið þeim. Hreinsið burt öll visin blóm strax, með því tryggið þið meira blómskrúð, annars leggur plantan orku sína í að mynda fræ. Allar plöntur þurfa næringu, gefið sumarblómunum ykkar Blómakraft. Alltaf eru að bætast við nýjar tegundir. Öll sumarblómin eru ræktuð í pottum þannig að rótarkerfið helst óskaddað.

Ísl.heiti	Latn.heiti	Lýsing
Aftanroðablóm	Lavatera trimestris	Blóm bleik, hæð 65 sm. stórar klukkur. Þarf stuðning og sólríkan vaxtarstað. Harðgert. Ræktuð í 12 sm. pottum
Apablóm	Mimulus x hybr.	Ýmsir litir, hæð 15-20 sm
Bláhnoða	Ageratum houstonianum	Blá blóm, þolir skugga, hæð 20-25 sm, Þolir ekkert frost. Ræktuð í 12 sm pottum.
Blákragafífill	Brachycome iberidifolia	Blá með auga, hengiblóm mjög blómsæll, falleg í skjóli. Ræktaður í 11 sm. pottum.
Blóðdropar Krists Fúksía	Fuchsia x hybrida	Margir litir og vaxtarlag bæði upprétt og hangandi. Ræktaðar í 12 sm- 4 l. pottum.
Blómahorn Milljónbjalla	Calibrachoa x hybrida	Hengiplöntur í ýmsum litum, blómviljugar. Þarf sól og sæmilegt skjól
Blómatóbak	Nicotiana hybrida	Ýmsir litir, hæð 30 sm. Ræktuð í 12 sm. pottum.
Borgardís	Diascia barberae	Ýmsir litir. Blómviljug hengiplanta. Fljót að ná sér eftir veðurskemmdir. Ræktuð í 11-12sm. pottum.
Brúðarauga Kantlobelia	Lobelia erinus	Mörg litaafbrigði. Dökkblá, blá, hvít, sprengd lillableik, blandað. Hæð 10-15sm.
Brúðarslæða	Gypsophila muralis	Bleik eða hvít hengiplanta verður alsett örsmáum, bleikum blómum, fínleg og falleg. Sólríkur vaxtarstaður Ræktuð í 11sm. pt.
Brúðarstjarna Cosmos	Cosmos bipinnatus	Blandaðir litir hæð 60sm. Þessi finlega planta er ótrúlega harðgerð. Ræktuð í 12 sm. pottum.
Daggarbrá	Leucanthemum paludosum	Hæð 20sm. hvít blóm með gula miðju (eins og margarita). Harðgerð og blómviljug.
Dahlía Glitfífill	Dahlia variabilis	Ýmsir litir, blóm fyllt eða hálffyllt. Hæð25-30sm. Þarf sól og skjól. Ræktuð í 13sm. pottum.
Eilífðarfífill	Helichrysum bracteatum	Blandaðir litir, hæð 30sm. Góð til að þurrka. Harðgert.
Fagurfífill Bellis	Bellis perennis	Rauður, hvítur eða bleikur. Hæð 20sm, mjög harðgerður.
Fiðrildablóm Nemisía	Nemesia strumosa	Blandaðir litir, mjög blómviljug, hæð 20-30 sm. Er illa við vætutíð.
Fjóla	Viola cornuta	Margir litir, meira að segja rauðar. Þið þekkið öll þessar elskur.
Flauelsblóm	Tagetes patula nana	Smáblómstrandi. Ýmsir litir. Hæð 20sm Ræktuð í 6 og 12sm pottum
Flauelsblóm	Tagetes erecta	Stórblómstrandi, gul, orans eða hvít. Hæð 25sm. Ræktuð í 12sm pottum.
Friggjarbrá	Chrysanthemum carinatum	Blandaðir litir, hæð 60sm. körfublóm. Harðgerð og blómviljug.
Glæsisalvia Salvía	Salvia splendens	Rauðir langir klasar. Hæð 25sm. Þarf sól og skjól. Ræktuð í 12sm. pottum.
Hádegisblóm	Dorotheanthus bellidiformis	Blandaðir skærir litir, hádegisblómið þarf að vera þar sem sólar nýtur sem best, það lokar blómunum þegar ekki er sól. Ekki gefa því mikinn áburð. Harðgert.
Hengibrúðarauga Hengilobelia	Lobelia erinus pendula	Margir litir. Hangir 20-30sm þarf mikið vatn og næringu. Ræktuð í 11-12sm pottum
Hengifjóla	Viola williamsii	Ýmsir litir. Virkilega duglegar og fallegar hengiplöntur. Þarf ekki eins mikið vatn og hengilobelía. Ræktuð í 11sm. pottum.
Hengipelargonia	Pelargonium pelatum	Blóm bleik eða ljósfjólublá, blómviljug hengiplanta. Þarf skjól. Ræktuð í 12-15sm pottum.
Hengipetunía ‘Surfinia’	Petunia ‘Surfinia’	Gróskumiklar og duglegar hengiplöntur í mörgum litum. Ræktuð í 13-15sm pottum.
Hengisumarklukka	Campanula	Tveir litir. Bleik eða ljósblá hengiplanta stórar klukkur, ræktuð í 11sm pottum.
Héraskott	Ovatus	Falleg puntstrá sem gaman er að þurrka.
Hjartaax	Briza maxima	Falleg puntstrá sem gaman er að þurka.
Húsmæðrablóm	Malvastrum capense	Blóm bleik, hæð 40-60sm. Er nú reyndar fjölær sígrænn lítill runni, sem verður að taka inn á veturnar. Ræktuð í 13cm-3l. pottum.
Ilmgullrunni	Hypericum	Blóm gul síðan rauð ber sem verða síðansvört. Ekki má borða berin. Fjölær lítill runni. Ræktaður í 2 lítra pottum.
Ilmskúfur Levkoj	Matthiola incana	Blandaðir litir rautt, fjólublátt eða hvítt í löngum ilmandi klösum. Hæð 20 – 30 sm.
Járnurt Hengijárnurt	Verbena x hybrida	Margir litir. Virkilega dugleg og falleg hengiplanta. Illa við mikla bleytu. Ræktuð í 11 – 12sm pottum
Kornblóm	Centaurea cyanus	Blóm rauð, blá eða bleik. Hæð 25sm. Blöð grá. Harðgert sumarblóm.
Krosshnappur	Glechoma hederacea	Blöð mislit. Skemmtileg hengiplanta í ker eða hengipotta.
Ljónsmunni	Antirrhinum majus	Blandaðir litir, hæð 50-70sm. Ræktaðir í 13sm. pottum.
Ljónsmunni	Antirrhinum majus	Ýmsir litir, blóm í löngum klösum. Hæð 25 sm. Þarf sólríkan vaxtarstað.
Margarita Möggubrá	Argyranthemum frutescens	Gular, hvítar og bleikar. Uppréttur vöxtur. Mjög harðgerðar og blómviljugar langt fram á haust. Ræktuð í 12-20sm. pottum.
Meyjarblómi	Godetia amoena	Blandaðir litir eða bleikt. Hæð 25sm. stórar klukkur, þessar lufsur verða ótrúlega fallegar. Harðgert.
Morgunfrú	Calendula officinalis	Blóm orans, hæð 25sm stór fyllt. falleg og harðgerð. Þið munið eftir morgunfrúnni í garðinum hjá ömmu og afa?
Nellikka	Dianthus	Einföld, í ýmsum litum. Harðgerð. Ræktuð í 11sm. pottum.
Nellikka	Dianthus	Fyllt ,rauð blóm og ilmandi. Þarf sól og skjól. Ræktuð í 11sm pottum.
Njarðarbrá	Chrysanthemum segetum	Gul, hæð 60sm Harðgerð og blómviljug.
Paradísarblóm	Schizanthus wisetonensis	Blandaðir litir mjög blómviljug, 20–30sm. Er illa við langvarandi vætutíð eins og okkur.
Pelargonia Mánabrúður	Pelargonium x hortorum	Rauð, blandað 25–30sm. Þarf sól og skjól. Ræktuð í 12sm pottum.
Petunia Tóbakshorn	Petunia grandifl.	Sjá Tóbakshorn
Silfurkambur	Senecio cineraria	Hæð 25 sm. Blómstrar ekki en blöðin eru silfurgrá og loðin, stendur langt fram á vetur. Mjög fallegur og harðgerður.
Silfurfoss	Dichondra argentea ‘Silver Falls’	Hengiplanta með silfurlit blöð. Ræktuð í 11sm. pottum.
Skjaldflétta	Tropaeolum majus nanum	Blandaðir litir, rauðir, gulir eða appelsínugulir. Dugleg hengiplanta. Bæði blöð og blóm góð í salat. Ræktuð í 12sm. pottum.
Skógarmalva	Malva silvestris	Fjólublá með æðum. Hæð 1- 2 metrar. Þetta er alveg satt. Þarf að binda upp. Kemur verulega á óvart. Ræktuð í 2 l. pottum.
Skrautkál	Brassica	Hvítt eða rautt (höfuðkál) falleg blaðhvirfing með hvítflekkóttum blöðum. Ef þið fáið leið á þessari jurt þá étið hana bara. Harðgert.
Skrautkál fíngert	Brassica	Blöð hvít eða rauðflekkóttur fínlegur blaðbrúskur. Harðgert og stendur lengi fram eftir hausti. Þið megið líka borða þessa.
Skrautnál Alissur	Lobularia maritima	Hæð 10sm. blóm ilmandi fjólublá eða hvít Falleg kantplanta.
Snædrífa	Sutera cordata (Chaenostoma cordatum)	Þetta er ótrúlega dugleg hengiplanta með bláum, bleikum eða hvítum blómum. Ræktuð í 11sm. pottum.
Sólargull	Helichrysum	Blöð grá, góð í hengipotta og ker. Harðgerð.
Sólboði	Osteospermum sp.	Stór körfublóm í ýmsum litum. þarf sólríkan stað, lokar blómunum í dimmviðri. Hæð 20-30cm. Harðgert.
Sólbrá	Chrysanthemum multicaule	Gul, hæð 10sm.sóllríkan vaxtarstað
Sólbrúður	Pericallis x hybrida	Hæð 30-40sm. þessi vekur óskipta athygli mjög harðgerð og blómviljug. Þolir illa mikinn hita, sterka sól og ofvökvun. Ræktuð í 12 sm pottum.
Sólhnappur	Sanvitalia procumbens	Blóm gul, blöð dökkgræn. Dugleg hengiplanta
Sumarhattur	Rudbeckia	Hæð 25-35sm. stór blóm gul með dökka miðju. Harðgerður. Ræktaður í 12sm pottum.
Stjúpur	Viola x wittrockiana	Hæð 10-25sm. Ýmsir litir. Harðgerðar. Það þekkja allir stjúpur.
Stjörnumalurt	Artemisia stelleriana	Hengi eða þekju planta, öll plantan hvítloðin, Ræktuð fyrst og fremst vegna blaðfegurðar. Minnir á jarðlægann silfurkamb
Sumarljómi	Phlox drummondii	Blandaðir litir, 15sm. Blómviljug.
Sumarnellikka	Dianthus	Hæð 10sm. blandaðir litir. Blómviljug. Dugleg.
Sumarstjarna	Aster chinensis	Blandaðir litir, fyllt blóm, hæð 20sm. Blómstrar frá júlí.
Tóbakshorn Petunia	Petunia multiflora plena	Fyllt blóm, blandaðir litir. Passið að klippa dauð blóm í burtu. Ræktuð í 12sm. pottum.
Tóbakshorn Petunia	Petunia grandifl.	Ýmsir litir. passið að klippa dauð blóm í burtu. Ræktuð í 12sm. pottum.
Vetrarax	Briza media	Falleg puntstrá.

  Uppfært 11. febrúar 2015